Therese Pace

1. Ir-Rih

2. Takkuna

3. Arterji u vini

4. Kemm nixtieq

Inkejjel l-univers minn tulu

u triqti nsib bla  nsaqsi

intellaq għomri kollu

u ħadd ma jiġri daqsi

 

Jien l-argużin tal-madmad

insaħħan, jew niffriża

inbewwes, jew insawwat

biex nagħti xi tbeżbiża

 

Inħobb nittanta l-pniener

kull xaqq issibni fih

insaffar  u ninbaram

u bħat-tfal żgħar niblieh

 

In-naħal jafni b’għadu

l-istess dublett fil-wisa

biss l-iktar li nħobb nagħmel

inħabbel xagħar in-nisa!

Intektek bil-għaġġla

Fuq spralli u qigħan

Indellel, nikkakkma

bankini u qatran.

 

Jien nisħaq supperva

Il-loqom b’għarqbejja

Bla noqgħod attenta

Minn fejn jien għaddejja

 

Insebbaħ bi ġmieli

Lill-aqwa skarpin

Niżżegleg, nintlewa,

Mat-tfajla fiż-żfin.

 

Tilbisni biex togħla

Ż-żinżilla qasira

Inġorrha fuq dahri

Għamlitni lsira

 

Jien l-għadu tat-twapet

Madum u l-irħam

Għax nigref u nbenġel

U ntaqqab l-injam

 

Jobgħodni s-silenzju

Ta’ waqt it-tqarbin

Għax nikser il-ġabra

Ta’ l-isbaħ ftit ħin.

 

Xi drabi bħall-lapes

Jien twila u rqiqa

Minn ġismi nħobb niekol

Għax minni żaqqieqa

 

Nitfellel, nitkagħbar,

Nissammar b’musmar

Biex jaqla’ wkoll bija

l-għixien l-iskarpar.

Hemm dawk imsejħa vini

Li jżejnu l-injam tagħna

Jgħinuk biex magħhom timxi

Inti u għaddej biċ-ċana.

                     

Kultant ikunu dritti,

Inkella ftit mgħawwġin,

Fejn kbar, u fejn jirqaqu,

B’xi ngroppi mżejnin.

 

U dawk ta’ ġo ġisimna

Li minnhom jgħaddi d-demm

Ukoll jissejħu vini,

U minnhom tgħidx kemm hemm.

 

U dawk li jkunu eħxen

Arterji, insejħulhom;

Minn qalbna għall-ġol-vini

Demm tajjeb iwasslulhom.

 

L-istess ngħidu għat-toroq

l-arterji huma l-kbar

li jwasslu għal ġor-raħal,

għall-vini, t-toroq żgħar.